لمى

لمى..........هكذا قررنا ان يكون اسمها
أول حفيدة للعيلة
كنا قد عرفنا هذا الاسم الشامي من اللبنانيين
لأن الاسم ده شائع عندهم
و كان جديدا هنا في مصر
وكان كل واحد يسألنا يعني ايه الاسم ده
أو يستظرف و يسأل بيتكتب ازاي: بالألف و لا ياء بطة
وكنا بنستنى أي ثانية نقابل فيها واحدة اسمها لمى لنحتفل بالاسم

و شاهدنا الاسم في التلفزيون في مناسبتين

الأولى
اعلان FAIR AND LOVELY
اللي بتيجي فيه بنت أمورة المفروض انها مذيعة و في النهاية بتقول اسمها لمى
أمي بتستنى الاعلان ده عشان تتمنى ان حفيدتها تكون كدة

أما الثانية
فكانت في نشرة الاخبار حيث اختلط صوت مراسلة العربية مع بكاء الأهالي

تواصل آلة الحرب الاسرائيلية ضرب المدنيين
ياااااااااااااااااااااااااا ابني

و وسط سكوت المجتمع المدني
آآآآآآآآآآه الله ياخدهم

ووسط تخاذل العرب
أنا مات مرتي و بناتي التنتين و لسة عم دور على جثث تلات صبيان

و واصل الأهالي التعرف على جثث ذويهم اما عن طريق الشكل أو حتى عن طريق المتعلقات الشخصية
هدي لمى لمى لمى آآآآآآآآآه
لمى لمى

انتفضت من مكاني حين نقلت الكاميرا صورة نعش صغير جدا ليحتوي الجسد الصغير و مكتوب عليه
لمى(ياء بطة).......صح